LADC inthlan Resultah Pol Party ten eng nge an sawi?

Lai Autonomous District Council inthlanpuia vote tla te chu vawiin khan Govt. Lawngtlai College Hall-ah chhiar a ni a, Bial la tam ber MNF Party chuan Bial 25 awmah bial 8 la in, INC in bial 7, ZPM in bial 6, BJP in bial 2 an la a, Independent Candidate 2 thlan tlin niin Party mala sorkarna siam thei an awm lo va, hriat theih chinah INC chuan Legislature Party din nghal in, Party hrang hrangten LADC inthlan chungchangah thuchhuah an siam zui bawk.

December ni 3 a LADC inthlanpui neih zawh takah khan vote – 56, 873 awmah , EVM – a vote tla zawng zawng chu 47, 769 niin, Postal Ballot-ah vote – 453 a tla a, heng Vote tlate hi Govt. Lawngtlai College Hall a Counting Hall pathum ah tukin dar 8 atang khan chhiar tan niin Bial 25 awmah bial 20 chuh tu MNF Party atang in Sangau South ah Pu JB. Vanhoy; Lungtianah Pu Sanghuliana Mualchin ; Bualpui ‘Ng’ West ah Pu Lalzahawma Chinzah; Lawngtlai Bazarah Pu Lalropuia Chinzah; Lawngtlai Chandmary ah Pu C. Lalsawmzuala ; Lawngtlai College Vengagh Pu C. Hrangthianga; Lawngtlai–III ah Pu MC. Lalbiakliana leh Diltlang ‘S’ ah Pu Hc. Lalthawmliana te thlan tlin an ni a, MNF dawta Seat la tam ber, Congress Party chuan bial 25 awmah bial 14 ah Candidate an dah a, bial 7 la in Lungpher South ah Kum 2020 LADC inthlanpuia Congress Party atanga thlan tlin awm chhun Pu C. Lalmuanthanga chu thlan nawn leh a ni a, Lawngtlai Vengpuiah Lawngtlai West bialtu MLA, MPCC Vice President ni bawk C. Ngunlianchunga; Chawngte ‘P’ ah Pu H.C. Lalengkima; Sakeiluiah Pu Sukriti Chakma ; M. Kawnpuiah Pu Premo Kanti; Sekulhah Pu J. Lalrawngbawla leh Tuithumhnarah Pu H. Vanlaltanpuia te thlan tlin an ni a, State a sorkar lai ZPM chuan bial awm zawng zawng bial 25 chuhin bial 6 an la a, ZPM atang hian Cheuralah Pu T. Lalchhuanvawra; Vawmbuk ah Kum 2020 LADC Inthlanpuia BJP atanga thlan tlin Pu T. Zakunga; Bualpui ‘Ng’ Eastah Dr. K. Lalchhuanpuia; Lawngtlai Council Vengah Pu Lallura Chinzah; Lawngtlai A.O.C ah Kum 2020 LADC inthlanpuia Independent a thlantlin Pu L.R. Dingliana Chinzah leh Bungtlang ‘S’ ah Pu K. Lalramzauva te thlan tlin an ni.

BJP chuan Bial 25 awmah bial 10 chuhin bial 2 ah hnehna an chang a, Kum 2020 a thlan tlin Pu BN. Thangpuia chu a bial ngai Sangau East ah thlan nawn leh niin Sangau West- ah Pu Lalchhuangliana thlan tlin a ni a, an ni bakah Paithar bialah Independent Candidate Pu V Zirsanga leh Vathuampui bialah Pu C. Lalneihkhuma Independent Candidate vek chu thlan tlin a ni bawk.


Lai District Congress Committee chuan 12-LADC General Election neih zawh takah Candidate 14 siamin, candidate 7 lai mai Mipui leh Pathian khawngaihna zara thlan tlin an ni chu thinlung takin lawmthu an sawi tih thuchhuah siamin an sawi a. Kan ram leh Hnam tana theihtawp chhuaha thawk turin kan ngenin duhsakna kan hlan a ni an ti.


Lai DCC Political Affairs Committee Meeting chuan Congress Legislature Party hruaitu tur inthlan tirna an nei tih sawiin CLP hruaitu a tan LEADER ah Pu C.Ngunlianchunga ; ⁠DY. LEADER ah Pu C.Lalmuanthanga, TREASURER ah Pu HC. Lalengkima leh SECRETARY: Pu H.Lalṭanpuia te an thlang a ni.
LADC inthlana Bial la tam ber MNF General Hqrs pawhin thuchhuah siamin LADC inthlan result hian sorkar dinglai ZPM mipuiin an rin tawk tawh lohzia a tarlang chiang hle. MNF MLA neih lohna bial pahniha seat 8 zet laa, MNF-in seat la tam ber kan ni thei hi a lawmawm kan ti tak zet a ni an ti a.

LADC-ah MNF kaihhruai sorkar nghet leh chak tak a din ngei an duhin an beisei tih an sawi.
MNF chuan Lai Autonomous District Council inthlan result puan takah bial la tam berin chak ber nihna kan chang a. He dinhmuna min hlangkaitu Pathian leh Lai ram mipui zawng zawngte chungah lawmthu kan sawi tak meuh a ni an ti bawk.
Huaisen taka Congress party aiawha ding Pu C. Ngunlianchunga, Vice President MPCC, MLA leh Congress Candidate zawng zawng te Congress thalaiin a chhuang takzet a ni.


Congress Thalai, Mizoram Pradesh Youth Congress Committee pawhin Lai Autonomous District Council inthlanah Congress party in nasa taka hma a sawn zia chiang takin a lang tih thuchhuah siamin an sawi a. Tun hnai term thum chhungin LADC MDC inthlanah party lian pathum zingah state-a sorkarna chelhtu zingah ZPM chiah in LADC MDC inthlanah sorkarna an siam thei lo nia sawiin, hei hian ZPM sorkar in beisei a phak loh zia leh mipuiin an rin tawk loh zia a tichiangah an ngai tih an sawi a, Kum 2015-ah state-a sorkana chelhtu Congress in Seat 16 la in an sorkar a, kum 2020 ah state-a sorkarna chelhtu MNF in seat 20 la in an sorkar bawk a. Kum 2025-ah an boruak san lai ber tura ngaihah state-a sorkarna chelhtu ZPM in sorkarna an siam thei ve lo leh khawvar hnu inthlana chakna an chan zawh loh zel avang hian mipuiin ZPM an hnawl tawh tih a nemnghet ah an ngai tih an sawi bawk.


Hetih lai hian ZPM General Hqrs pawhin Tun tuma LADC inthlanah seat la tam ber ni lo mahse; kum 2020 LADC inthlanpui atanga an party hmasawnna chu lawmawm an tih thu thuchhuah siamin an sawi a. an party candidate vote-tu zawng zawng te, party tana theih tawp chhuahtu- General Headquarters, District Headquarters, Block leh Unit atanga campaign-a feh chhuak zawng zawng te chungah lawmthu kan sawi an ti a, campaign laia ZPM campaigner, mi rilru tina zawng emaw, harsatna thlen emaw an awm a nih chuan ngaihdam an dil tih sawiin Zoram siam thatna leh hmasawn zelna tur ngaihtuah tlang a, party tinte theih tawp chhuah zel turin kan insawm e an ti.
ZPM President Pu Lalliansawta pawhin an candidate-te vote tlinsaktu Lai ram mipuite chungah thinlung takin lawmthu a sawi tih thuchhuah siamin a sawi bawk a, chutih rualin hlawhtlinna chang zo ve lo te an tawrhpui tak zet a, beidawng mai lova party tana ṭhahnemngai taka thawk zel tura an beisei thu sawiin Lai ramah Sorkar ngelnghet a pian theih nan engtik lai pawhin ZPM Party a in hawng reng tih a sawi bawk.